Mae Campau'r Ddraig yn fenter gan Chwaraeon Cymru a gyllidir gan y Loteri Genedlaethol a'i nod yw cynnig i blant 7-11 oed gyfleoedd chwaraeon hwyliog a phleserus.

Gan weithio'n agos ag ysgolion a chlybiau chwaraeon cymunedol, mae Campau'r Ddraig yn cael effaoth ddramatig ar gyfranogiad mewn chwaraeon drwy annog plant i gymryd rhan mewn amrywiaeth o weithgareddau chwaraeon trefnus.

Mae'r cynllun yn ehangu diddordebau chwaraeon y plant sydd eisoes yn cymryd rhan ac yn cynnwys y plant sydd heb gyfleoedd o'r fath ar hyn o bryd y tu allan i'w gwersi AG yn yr ysgol.

Mae Campau'r Ddraig yn cyflwyno plant i hyfforddiant, datblygiad sgiliau a chystadlaethau priodol gan ddefnyddio fersiynau o gemau oedolion wedi'u haddasu i ddiwallu eu hanghenion a'u lefelau sgiliau. ô

Defnyddir portffolio o wyth camp wedi'u haddasu fel rhan o'r cynllun. Yr wyth camp sy'n rhan o Gampau'r Ddraig yw:

• Athletau
• Criced
• Pêl Droed
• Golff
• Hoci
• Pêl Rwyd
• Rygbi
• Tenis

Er mai prif ffocws Campau'r Ddraig yw gwella'r ddarpariaeth chwaraeon ar gyfer plant 7 11 oed ledled Cymru, mae hefyd yn canolbwyntio ar recriwtio rhieni a gwirfoddolwyr eraill fel cynorthwywyr i gefnogi datblygiad y clybiau ar ôl ysgol a'r clybiau chwaraeon cymunedol.

Cefnogir y rhaglen gan amrywiaeth cynhwysfawr o gardiau adnoddau ac offer i helpu gyda chyflwyno sesiynau Campau'r Ddraig, gyda deunyddiau pellach ar gyfer recriwtio a hyfforddi rhieni, athrawon a hyfforddwyr gwirfoddol.                   

Mae'r rhaglen yn canolbwyntio ar ddefnyddio'r adnoddau hyn i ddatblygu cyfleoedd y tu allan i gwricwlwm yr ysgol ac yn y gymuned.

Mae'r adnoddau i gyd yn cyd-fynd â'r cwricwlwm felly gall nifer o ysgolion ac athrawon ddewis eu defnyddio mewn gwersi AG. Mae Campau'r Ddraig yn creu cysylltiadau â chlybiau chwaraeon a gweithgareddau cymunedol eraill drwy gynnig i blant a gwirfoddolwyr gyfleoedd i wneud cynnydd mewn amrywiaeth eang o chwaraeon.

Mae Cydlynwyr Campau'r Ddraig lleol yn darparu cyngor cam-wrth-gam a hyfforddiant i helpu ysgolion, clybiau chwaraeon a gwirfoddolwyr i gyflwyno Campau'r Ddraig. Cynigir y cymorth hwn i ysgolion ac i glybiau drwy gyfrwng rhaglen barhaus, wedi'i chytuno mewn partneriaeth ag awdurdodau lleol, ymgynghorwyr AG, cyrff rheoli chwaraeon cenedlaethol, ysgolion a darparwyr chwaraeon lleol eraill.                                                         

Hefyd, gellir cyflwyno Campau'r Ddraig mewn canolfannau hamdden, grwpiau ieuenctid a sefydliadau gwirfoddol.

Mae Campau'r Ddraig:

• wedi cael eu haddasu i fod yn addas i oedran, maint, gallu, lefel sgil a phrofiad y chwaraewyr;
• yn defnyddio rheolau syml, offer a mannau chwarae llai a hyfforddiant hwyliog;
• yn paratoi chwaraewyr ar gyfer gêm yr oedolion;
• yn ddiogel ond eto'n heriol.

Wrth gymryd rhan yng Nghampau'r Ddraig, rydym yn disgwyl i gyfranogwyr:

• Chwarae gan gadw at y rheolau;
• Peidio â chynhyrfu, waeth beth sy'n digwydd;
• Chwarae'r gêm am hwyl;
• Derbyn penderfyniad y dyfarnwyr bob amser;
• Ymateb i ennill a cholli gydag urddas;
• Parchu gwrthwynebwyr, hyfforddwyr/athrawon, dyfarnwyr a chyd-aelodau eu tîm;
• Llongyfarch y tîm sy'n eu herbyn a diolch iddo ar ddiwedd y gêm;
• Ysgwyd dwylo a bod yn hapus, boed ennill neu golli.

Hybir CHWARAE TEG a gweithgareddau CYNHWYSOL ac fe'u cadarnheir yn gyson drwy gyfrwng yr holl ddeunyddiau a'r pecynnau hyfforddi sy'n gysylltiedig â Champau'r Ddraig.

Cysylltwch â'ch Tîm Datblygu Chwaraeon lleol am ragor o wybodaeth.

Cliciwch Yma i fynd i mewn i Ogof y Ddraig

Gwneud i sesiwn redeg yn esmwyth

Nid yw trefnu criw o blant i gymryd rhan mewn chwaraeon yn dasg hawdd bob amser ond dylai'r cyngor doeth hwn eich helpu i wneud i bethau redeg mor esmwyth ag y bo modd.

• Lleihau faint o weithiau ydych chi'n stopio sesiwn. Dim ond stopio pan ydych mewn lle da a lle gall pawb eich gweld a'ch clywed chi.
• Annog gweithgareddau ffocws a dim ond stopio os oes gennych rywbeth pwysig i'w gyfrannu.
• Ceisio helpu unigolion yn ystod gweithgaredd yn lle tarfu ar y gêm neu'r ymarfer.
• Bod yn glir ond heb or-wneud pethau. Mae sut mae pethau'n cael eu dweud yr un mor bwysig â'r hyn sy'n cael ei ddweud.
• Gwnewch yn siwr bod pawb yn gallu gweld a chlywed unrhyw arddangosfa rydych ar fin ei rhoi.
• Unwaith rydych wedi hoelio sylw'r grŵp, mae'n rhaid i chi egluro pethau'n gyflym ac yn glir.
• Dewiswch un neu ddau o bwyntiau i'w hegluro. A pheidiwch â defnyddio gormod o eiriau i'w hegluro. Byddwch yn glir a chryno.
• Gall arddangosfa fod yn werth 1,000 o eiriau.
• Cadwch yr arddangosfa'n syml - a'i hailadrodd. Gwnewch yn siŵr bod pawb yn gwybod beth ellir ei gyflawni cyn iddynt roi cynnig arni.
• Gofynnwch a oes gan unrhyw un gwestiwn am yr hyn maent ar fin ei wneud a chynigiwch gyngor.

Rheoli sesiwn hyfforddi

Y rheol euraid ar gyfer unrhyw sesiwn hyfforddi yw ei wneud yn hwyl i'r plant bob amser.

Defnyddiwch hyfforddiant seiliedig ar gemau - mae plant wrth eu bodd yn chwarae. Gallwch guddio ymarferion drwy ddefnyddio gemau, ond cofiwch mai nid y ffocws yw'r canlyniad. Mae'n rhaid cynllunio'r sesiynau i gyd ymlaen llaw felly meddyliwch am y canlynol:

• Beth ydych chi'n mynd i'w wneud?
• Beth mae'r plant ei angen/eisiau ei wneud?
• Beth yw gallu'r plant rydych yn cynllunio ar eu cyfer?
• A ydych wedi dewis gweithgareddau priodol?
• Gwiriwch y man chwarae i wneud yn siŵr ei fod yn ddiogel
• Gosodwch yr offer yn ei le ymlaen llaw
• Rhaid i chi ddeall y sgiliau rydych ar fin eu dysgu

Y sesiwn

Bydd y canlynol o gymorth i chi lunio cynllun sylfaenol ar gyfer sesiwn awr:

• Dechreuwch ar amser bob tro, ac yn ddiymdroi.
• Ewch drwy o leiaf 5-10 munud o ymarferion cynhesu.
• Ewch dros sgil rydych wedi'i dysgu'n flaenorol i annog agwedd bositif. Dylech ganmol ac annog yn aml.
• Dangoswch sgiliau newydd - caniatewch 5-10 munud ar gyfer hyn. Gwnewch yn siŵr bod pawb yn gallu gweld. Dangoswch yn araf a chlir i ddechrau arni.
• Mae plant angen deall lle mae pob sgil yn ffitio gyda'r lleill fel eu bod yn gallu eu defnyddio ar yr amser priodol. Gadewch i bawb roi cynnig ar ymarfer cyfres newydd o sgiliau.
• Gwyliwch beth sy'n digwydd. Os yn ymyrryd i gywiro, ceisiwch wneud hynny'n bositif. Os yw'r sgil yn anodd i'r plant ei deall, dangoswch hi eto.
• Gadewch ddigon o amser ar gyfer chwarae gemau - ryw chwarter, gyda dim ond y cyfarwyddiadau sydd raid wrthynt yn ystod y cyfnod hwn. Sicrhewch bod pawb yn cymryd rhan.
• Gorffennwch gyda digon o amser am ryw 5-10 munud o ymarferion oeri a chofiwch gynnwys gemau hwyliog i gynnal eu diddordeb. Mwy am ymarferion oeri.
• Tra bo'r plant yn oeri, daliwch i siarad gyda hwy. Holwch gwestiynau am y sgil maent wedi'i dysgu a rhowch rywfaint o adborth positif.

Wedi'r sesiwn

• Caniatewch amser i werthuso beth ddigwyddodd.  A oedd pawb yn cael hwyl? Os na, pam ddim?
• A oedd pawb yn cael rhoi cynnig arni ynteu a oedd rhai'n cael eu heithrio? Beth fyddech yn ei wneud i wella'r sesiwn nesaf?

Mae gan famau, tadau ac athrawon gyfoeth o sgiliau a gall Campau'r Ddraig gynnig cyfle i roi'r sgiliau hyn ar waith drwy chwaraeon, tra'n cael hwyl gyda'r plant hefyd.

Yn hytrach na dim ond gollwng eu plant yn y clwb chwaraeon, rydym am weld rhieni'n torchi eu llewys ac yn rhoi cynnig ar weithgareddau.

Mae trefnu chwaraeon teuluol yn gyfle gwych i dreulio amser gwerthfawr ac adeiladol gyda'r plant hefyd. Cymharwch awr o chwaraeon gydag awr o wylio teledu - dim ond chwaraeon sy'n gwella eich sgiliau cyfathrebu, eich iechyd a'ch ffitrwydd.

Ni fyddai unrhyw riant am weld ei blentyn yn tyfu i fod yn ddiogyn ar y soffa - dyma gyfle rhagorol i rieni feithrin arferion iach yn eu plant o oedran cynnar, i wneud pob plentyn yng Nghymru'n gryfach ac yn fwy heini.

Pa well rhodd na hynny sydd?

Gwirfoddolwyr

Mae gwirfoddolwyr presennol Campau'r Ddraig wedi dweud eu bod yn cael pleser a boddhad o weld plant yn dysgu sgiliau newydd ac yn cael hwyl. Hefyd, mae nifer o'r gwirfoddolwyr yn hyfforddwyr cymwys bellach ac yn gwneud cyfraniad gwerthfawr at chwaraeon yn eu cymuned.

Bydd cynyddu nifer y gwirfoddolwyr yng Nghampau'r Ddraig yn galluogi mwy o blant i gymryd rhan yng Nghlybiau Campau'r Ddraig. Hefyd, bydd yn galluogi rhieni, athrawon, myfyrwyr a gwirfoddolwyr eraill i sicrhau hyfforddiant a gwneud cyfraniad gwerthfawr at chwaraeon.

Ni fyddai chwaraeon yn digwydd oni bai fod rhieni, athrawon a phobl eraill yn rhoi o'u hamser i drefnu chwaraeon ar gyfer plant.

Gwirfoddolwyr yw'r gwir allwedd i ddatblygu chwaraeon yng Nghymru.

Nid dim ond y tîm a'r plant sy'n elwa.

Gall gwirfoddoli fod yn rôl gymdeithasol lle rydych yn cwrdd â phobl newydd ac yn dysgu sgiliau newydd.

Gweithredir nifer fawr o glybiau chwaraeon gan wirfoddolwyr ac maent angen pob math o gymorth er mwyn sicrhau eu bod yn parhau i gael eu rhedeg yn esmwyth.

Does dim raid i chi fod yn cymryd rhan yn rheolaidd mewn chwaraeon

Mae llawer o glybiau'n awyddus i recriwtio gwirfoddolwyr gyda phrofiadau neu sgiliau amrywiol. Allwch chi helpu gyda:

• Arlwyo - O dywallt diodydd hanner amser i baratoi brechdanau ciwcymbyr ar gyfer cinio
• Cynnal a chadw - Boed yn gôt newydd o baent ar gyfer adeilad y clwb neu helpu i wastatáu'r cae
• Cludiant - Mae plant angen eu cludo o le i le. Mae ffurfio pŵl cludiant yn syniad da fel bod pawb yn rhannu'r baich
• Glanhau - Mae'n swydd fudr ond mae'n rhaid i rywun ei gwneud!
• Hyfforddwr cynorthwyol -Efallai fod angen estyn offer allan; mae hyfforddwyr angen cymorth i redeg sesiynau bob amser
• Gweinyddu - Pwy sydd ar gael ar gyfer y gêm nesaf? Gallech drefnu'r cyfan dros y ffôn neu drwy e-bost. A yw'r tîm angen cofrestru gyda chynghrair? Efallai y gallwch chi ysgrifennu'r llythyr.
• Cyllid - A yw ffi danysgrifio'r gynghrair wedi'i thalu? A oes angen rhoi arian parod i'r naill ochr ar gyfer taith arbennig? Gall y rhai gyda sgiliau mathemategol gwych helpu.
• Codi Arian - Allwch chi drefnu nawdd ar gyfer y tîm drwy gyfrwng eich gwaith? Allwch chi gynnal digwyddiadau fel gemau noddedig neu arwerthiannau cist car? Mae clwb chwaraeon angen help gyda'r arian bob amser.

Felly beth am wirfoddoli i helpu?

Meddyliwch am yr hyn allech chi ei wneud a chysylltwch â'ch  Cydlynydd Campau'r Ddraig lleol i weld allwch chi helpu.

Helpwch eich plentyn i ddewis y gamp fwyaf addas iddo. Oce, mae'n casáu chwaraeon raced, heb unrhyw ddiddordeb mewn cicio pêl droed o gwmpas y lle ac mae bob amser yn ceisio osgoi athletau.

Felly beth am roi cynnig ar rygbi?

Cofiwch, mae llawer o chwaraeon heb eu cynnwys yn y cwricwlwm ysgol.

Cydbwysedd iach
Peidiwch â disgwyl gormod gan eich plant. Mae'n hawdd ffitio chwaraeon o amgylch gweithgareddau eraill, fel chwarae offerynnau cerdd neu ymweld â ffrindiau.

"Fy ffordd i"
Gadewch i blant gymryd rhan yn eu hamser eu hunain ac yn eu ffordd eu hunain.

Cymryd rhan
Fodd bynnag, gallwch chi osod esiampl drwy gymryd rhan eich hun. Mae chwaraeon yn ffordd wych o dreulio amser gyda'ch gilydd fel teulu.

Am wybodaeth bellach am y clybiau yn eich awdurdod lleol, ewch i dudalen 'Cael Hyd i'ch Cydlynydd Lleol'

Fe allwch chi wneud gwahaniaeth!
Ceisiwch ganfod beth yw eich rôl a'ch cyfrifoldeb chi a darganfod sut i wneud cyfranogiad eich plentyn mewn chwaraeon yn fwy pleserus.

Pam fod plant yn cymryd rhan mewn chwaraeon?
Mae'n amlwg dydi. Mae plant yn cymryd rhan oherwydd eu bod eisiau cael hwyl a mwynhau eu hunain. Ond nid dyna'r unig reswm.

Magu hyder
Bydd cymryd rhan mewn chwaraeon yn helpu eich plentyn i fagu hyder. Hefyd bydd yn teimlo ei fod yn cyflawni. I lawer o blant, chwaraeon yw eu cyfle i ddisgleirio ond mae eraill yn gallu cael eu hisraddio. Felly cofiwch sicrhau mai'r gamp mae eich plentyn yn cymryd rhan ynddi yw'r un fwyaf addas iddo.

Chwaraewr Tîm
Mae plant yn hoffi teimlo'n rhan o dîm ac mewn chwaraeon gallant fwydo oddi ar egni a brwdfrydedd aelodau eraill eu tîm. Mae'n gallu eu tynnu allan o'u cragen yn sicr.

Nid ennill yw popeth
Mae chwaraeon yn hynod gyffrous ond nid yw pob plentyn eisiau ennill. Er bod rhai plant wrth eu bodd yn cystadlu, mae eraill yn swil wrth wneud hynny. Felly peidiwch â'u gorfodi! Fe allech ddychryn eich plentyn rhag gwneud dim byd â chwaraeon byth eto. Os yw eich plant yn mwynhau ennill, ceisiwch ddarganfod a oes unrhyw gystadlaethau y gallant gymryd rhan ynddynt yn erbyn plant o oedran tebyg.

Cofiwch sicrhau cydbwysedd rhwng chwaraeon a chwarae.

Gwrando Mwy
Ceisiwch ddarganfod beth mae eich plentyn yn ymddiddori ynddo a'i annog yn ysgafn. Beth am roi cynnig ar fynd ag ef i wylio gêm i ddechrau? Hyd yn oed os mai dim ond gêm bêl droed gyfeillgar yn y parc lleol ydi hi i ddechrau.

Does unman yn debyg i gartref
Mae cicio pêl yn yr ardd gefn yn ffordd wych o fwynhau chwaraeon. Mae'n amgylchedd heb unrhyw fygythiad ynddo a bydd yn magu hyder eich plentyn.

Arwain drwy esiampl
Os ydych yn cymryd rhan mewn camp, ewch â'ch plentyn gyda chi. Beiciwch i'r siop gyda'ch gilydd yn lle neidio i'r car. Peidiwch â gwylio o'r ochr - ewch i mewn i'r pwll nofio gydag ef.

Deall y gamp
Mae'n syniad da ceisio deall y gamp mae eich plentyn yn ei chwarae, dim ond drwy ddysgu sylfeini'r chwarae, y safle mae'n chwarae ynddo a'r sgiliau mae eu hangen. Ni fyddwch yn teimlo ar goll wedyn wrth iddo adrodd ei hanes gyda'i bas gyfnewid drawiadol a'r ddolen ddwbl a arweiniodd at gais buddugol ei dîm!

Cadw'r ffydd
Dylech fod â ffydd bod eich plentyn yn gwybod beth mae'n ei wneud. Gadewch iddo wneud ei benderfyniadau ei hun a dysgu oddi wrth ei gamgymeriadau.

Mae'n bwysig bod yn ymwybodol o'r peryglon pan mae eich plentyn yn cymryd rhan mewn chwaraeon. Bydd rhoi eich plant dan ormod o bwysau'n gwneud mwy o ddrwg na lles. Efallai eich bod yn talu ffioedd clwb drud ac yn gyrru eich plentyn i'w holl gemau, ond dydi hynny ddim yn golygu bod raid iddo ennill bob tro mae'n chwarae.

Mae rhai rhieni eisiau gwireddu eu breuddwydion chwaraeon drwy eu plant, ond meddyliwch ddwywaith cyn gwthio eich plant. Efallai mai dim ond cael hwyl maen nhw eisiau, gan ragori ar lefel llai cystadleuol. Yn aml iawn, y cyfan maen nhw eisiau ei wneud yw chwarae gyda'u ffrinidiau.

Gall eich uchelgais chi eu rhoi dan bwysau a chodi cywilydd arnynt o flaen eu ffrindiau. Peidiwch â gwthio eich plentyn i fod yn bêl droediwr proffesiynol os mai'r cyfan mae o eisiau ei wneud yw cicio pêl o gwmpas.

Mae'n iawn bod yn uchelgeisiol ond yn hawdd iawn mynd rhy bell.

Cofiwch dim ond canran fechan o blant sy'n rhoi cynnig ar gamp fydd yn gwneud bywoliaeth allan ohoni. Pleser, twf a datblygiad eich plentyn ddylai gael blaenoriaeth gennych chi.

Her newydd?
Os yw eich plentyn yn dechrau colli diddordeb, ceisiwch ganfod pam a meddwl am ffyrdd o ailennyn y diddordeb hwnnw. Efallai ei fod angen her newydd. Drwy annog eich plant i roi cynnig ar chwaraeon eraill, byddwch yn gwneud iddynt deimlo eu bod yn rheoli eu dewisiadau.

Mae llond gwlad o chwaraeon ar gael, felly os nad ydynt yn hoff o bêl fasged, efallai y bydd athletau at eu dant.

Cael hwyl yw'r holl nod mewn chwaraeon, yn ogystal â dysgu sgiliau newydd.

Cefnogaeth emosiynol
Po fwyaf mae eich plentyn yn cymryd rhan mewn camp, y mwyaf o gefnogaeth y bydd ei angen gennych chi. Os yw eich plant yn cymryd chwaraeon o ddifrif, byddant dan bwysau ar adegau; dyma pryd fyddant angen eich cymorth chi.

Gall chwaraeon arwain at emosiynau eithafol, fel gorfod delio â cholli neu'r adrenalin cyffrous a deimlwch wrth ennill. Efallai mai hwn fydd tro cyntaf eich plentyn i brofi teimladau o'r fath, ond nid y tro olaf - mae chwaraeon yn lle da i gychwyn.

Rhowch gymaint o gefnogaeth ag y bo modd iddynt drwy fynychu cymaint ag y bo modd o'u gemau a'u cystadlaethau - byddant yn gwerthfawrogi eich presenoldeb.

Bod yn rhan o'r darlun
Os yw eich plentyn angen eich cefnogaeth, gwnewch yn siwr eich bod ar gael. Gwell fyth, cymerwch ran drwy wirfoddoli eich gwasanaeth neu ddechrau hyfforddi, yna byddwch mewn sefyllfa well o lawer i'w helpu.

Chwarae'r gêm
Unwaith mae eich plentyn yn dechrau cymryd rhan mewn chwaraeon, ceir pwysau ychwanegol, fel paratoi ar gyfer treialon, ennill a cholli, gallu cydweithio â'r hyfforddwr ac aelodau eraill y tîm. Gwnewch yn siŵr eich bod yn gwybod beth sy'n digwydd.

Cael eu dewis ar gyfer y tîm
Gall hwn fod yn amser anodd i'r plant - ac i chi. Os yw eich plentyn yn dechrau poeni am yr hyn mae'r hyfforddwr yn ei feddwl ohono, gan gymharu ei berfformiad â pherfformiad aelodau ei dîm, gall deimlo dan bwysau.

Cofiwch ei atgoffa i ganolbwyntio arno ef ei hun. Gosodwch nodau iddo a siaradwch am ffyrdd o'u cyrraedd. Cofiwch atgoffa eich plant nad yw methu mewn un treial arbennig yn golygu na fyddant yn llwyddo mewn treialon eraill.

Cyfleu'r neges briodol
Er nad oes neb yn hoffi colli, dylid atgofa plant mai'r ffordd rydych yn chwarae sy'n bwysig. Gall cwestiynau fel 'Wnaethoch chi ennill?' a 'Wnes di sgorio?' wneud i'ch plant deimlo eu bod wedi methu.

Canolbwyntiwch ar gynnal hyder eich plentyn. Gofynnwch iddo a yw wedi mwynhau'r gêm a sut fyddai wedi gallu gwneud yn well.

Yn bwysicach na dim, gofynnwch i'ch plentyn a yw wedi cael hwyl.

Cyd-dynnu â'r tîm
Efallai mai hwn yw'r tro cyntaf i'ch plentyn fod yn rhan o dîm; dylid ei annog i ddod i adnabod yr aelodau eraill ynddo. Mae'r un peth yn wir am eich perthynas chi â'r hyfforddwr a'r rhieni eraill.

Mae gennych nodau gwahanol i gyd: rydych chi'n poeni am berfformiad eich plentyn ac mae'r rhieni eraill yn poeni am berfformiadau eu plant hwy, a'r hyfforddwr am y tîm cyfan.

Os yw'r hyfforddwr yn gwneud penderfyniad nad ydych yn hapus ag o, ceisiwch beidio â chodi helynt ag o oherwydd bydd hyn yn sicr o greu mwy o gur pen i'ch plentyn.

Neu gallech roi cynnig ar hyfforddi eich hun.

Cystadleuaeth Wimbledon



Cliciwch yma am fynediad

Harry Hooper, bachgen deg oed o Ysgol Pontnewydd-ar-Wy, Powys oedd enillydd lwcus cystadleuaeth 'Cwpan Ryder' ddiweddar Campau'r Ddraig.

Dewiswyd enw Harry ar hap allan o fwy na 300 o gystadleuwyr a atebodd 3 chwestiwn am golff yn gywir, ac am Gwpan Ryder 2010 yn benodol, a gynhaliwyd ar Gampws y Celtic Manor fis Hydref 2010.

Isod gwelir Wendy Langford, Cydlynydd Campau'r Ddraig ar gyfer Powys, yn cyflwyno set o glybiau golff a pheli i Harry, a oedd wrth ei fodd gyda'i wobr.

Bydd y gystadleuaeth nesaf yn cael ei lansio fis Ionawr!