Annog ysgolion Cymru i sicrhau tocynnau Llyndain 2012

Wrth i bobl ar hyd a lled y byd yn edrych ymlaen at Llundain 2012, gall ysgolion yng Nghymru warantu cyfran i'w disgyblion nhw.

Drwy gofrestru gyda rhwydwaith 'Get Set' ledled y DU, bydd yr ysgolion yn cael cyfran o docynnau'n awtomatig i ddigwyddiadau yn y Gemau Olympaidd a Pharalympaidd.   

Bydd cyfanswm o 50,000 o docynnau'n cael eu dosbarthu i ysgolion ar hyd a lled y DU (yn ogystal â neilltuad i ysgolion yn Llundain).     
            
Get Set yw rhaglen addysgol swyddogol Llundain 2012 ar gyfer ysgolion a cholegau ledled y DU.  

Gyda'r broses ymgeisio syml ar agor yn awr, gall ysgolion a cholegau sy'n dangos eu bod yn defnyddio gwerthoedd Olympaidd a Pharalympaidd i wella eu cwricwlwm wneud cais am ymuno â'r rhwydwaith.    
         
Unwaith y bydd yr ysgolion wedi cofrestru, byddant yn cael cyfleoedd unigryw a chyfle i gymryd rhan mewn mentrau yn ystod y cyfnod yn arwain at y Gemau, a gallai hynny gynnwys ymweliadau gan athletwyr neu deithiau o amgylch y Parc Olympaidd.

Hefyd, gall athrawon a myfyrwyr wneud defnydd o adnoddau am ddim fel ffilmiau a lluniau, a gallant gymryd rhan mewn cystadlaethau hefyd.

"Mae bod yn rhan o Lundain 2012 yn gyfle cwbl unigryw ac yn un rydym am weld pobl ifanc Cymru'n bod yn rhan ohono," meddai'r Athro Laura McAllister, Cadeirydd Chwaraeon Cymru.

"Mae'n gyfrwng arall i Gemau Llundain 2012 adael treftadaeth addysgol, ddiwylliannol a chymdeithasol barhaus. 

"Mae cael gwarant o gyfran o'r tocynnau i'r ysgolion yn gymhelliant enfawr.     
    
"Yr uchelgais yw cael pob ysgol yng Nghymru i gofrestru - mae'n broses mor syml.     
 
"Gallwn helpu i greu cymuned chwaraeon arbennig rhwng ysgolion yng Nghymru a thu hwnt."

Cwblheir y broses mewn dwy ran. Mae'r ysgolion yn cofrestru ar y rhwydwaith i ddechrau ac yna'n cymryd y cam cofrestru nesaf i dderbyn eu gwobrau.  

I ymuno â'r rhwydwaith, dim ond ateb tri chwestiwn sydd raid i'r ymgeiswyr:    

• Pam mae eisiau ymuno?
• Beth maent wedi'i wneud eisoes i ymrwymo i werthoedd Olympaidd a Pharalympaidd?
• Beth maent yn fwriadu ei wneud yn y dyfodol?

Meddai'r Gweinidog Tai, Adfywio a Threftadaeth, Huw Lewis:

"Mae Llywodraeth Cymru'n gweithio'n galed i sicrhau bod Cymru yn cael budd o Lundain 2012, cyn, yn ystod ac ar ôl y Gemau. Mae sawl tîm wedi defnyddio Cymru eisoes fel eu canolfannau cynefino blwyddyn-i-fynd, gan gynnwys Tîm Nofio Olympaidd De Affrica a Thîm Codi Pwysau Tsieina.

"Mae gwledydd eraill gan gynnwys Seland Newydd, Awstralia, Trinidad a Tobago, Triathletwyr Iwerddon a'r Gymdeithas Paffio Amatur Ryngwladol hefyd wedi dewis Cymru ar gyfer eu gwersylloedd ymarfer swyddogol yn ystod y cyfnod yn uniongyrchol cyn y Gemau. Mae hyn yn glod i'r cyfleusterau sydd ymhlith y gorau yn y byd sydd gennym yma ac i waith caled sefydliadau Cymru i ddenu talent elît i Gymru.

"Mae'n hollbwysig bod profiad Llundain 2012 yn ymestyn y tu hwnt i'r athletwyr dawnus sy'n cymryd rhan uniongyrchol yn y Gemau. Mae rhaglen 'Bydd Barod' yn gyfle gwych i bobl ifanc fod yn rhan o'r profiad hwnnw ac i ddysgu'r gwerthoedd Olympaidd ehangach fel penderfyniad, gwaith tîm a cheisio bod y gorau y gallwch chi ei fod."

Anogir yr ysgolion sydd wedi cofrestru, ond nad ydynt wedi cymryd y cam nesaf i ymuno, i gwblhau eu ceisiadau cyn dyddiad cau 16 Rhagfyr 2011.

Meddai'r Gweinidog Addysg a Sgiliau, Leighton Andrews:

"Mae menter Bydd Barod yn cynnig cyfle i ysgolion ddefnyddio pŵer Gemau Olympaidd a Pharalympaidd Llundain 2012 i gynnwys pobl ifanc ym mhob agwedd ar y cwricwlwm.

"Mae'r cynllun yn ysbrydoli pobl ifanc i roi cynnig ar chwaraeon yn yr ysgol a'r gymuned ehangach ac i fyw bywydau iach a gweithgar, yn ogystal â'u hannog i ddatblygu eu sgiliau yn gyffredinol, o lythrennedd a rhifedd i greadigrwydd ac arloesedd."

Gall athrawon neu Lysgenhadon Aur neilltuedig yr Ymddiriedolaeth Chwaraeon Ieuenctid gyflwyno'r cais ar ran yr ysgol.

Ymunwch â'r rhwydwaith nawr yn getset.london2012.com/cy/hafan.