Cofrestr chwaraeon ar agor i ysgolion Cymru

Wrth i bobl ar hyd a lled y byd aros i glywed a ydynt wedi sicrhau tocynnau ar gyfer Llundain 2012, gall ysgolion yng Nghymru warantu cyfran i'w disgyblion nhw.

Drwy gofrestru gyda rhwydwaith 'Get Set' ledled y DU, bydd yr ysgolion yn cael cyfran o docynnau'n awtomatig i ddigwyddiadau yn y Gemau Olympaidd a Pharalympaidd.   

Bydd cyfanswm o 50,000 o docynnau'n cael eu dosbarthu i ysgolion ar hyd a lled y DU (yn ogystal â neilltuad i ysgolion yn Llundain).                 

Get Set yw rhaglen addysgol swyddogol Llundain 2012 ar gyfer ysgolion a cholegau ledled y DU.  

Gyda'r broses ymgeisio syml ar agor yn awr, gall ysgolion a cholegau sy'n dangos eu bod yn defnyddio gwerthoedd Olympaidd a Pharalympaidd i wella eu cwricwlwm wneud cais am ymuno â'r rhwydwaith.             

Unwaith y bydd yr ysgolion wedi cofrestru, byddant yn cael cyfleoedd unigryw a chyfle i gymryd rhan mewn mentrau yn ystod y cyfnod yn arwain at y Gemau, a gallai hynny gynnwys ymweliadau gan athletwyr neu deithiau o amgylch y Parc Olympaidd.

Hefyd, gall athrawon a myfyrwyr wneud defnydd o adnoddau am ddim fel ffilmiau a lluniau, a gallant gymryd rhan mewn cystadlaethau hefyd.

"Mae bod yn rhan o Lundain 2012 yn gyfle cwbl unigryw ac yn un rydym am weld pobl ifanc Cymru'n bod yn rhan ohono," meddai'r Athro Laura McAllister, Cadeirydd Chwaraeon Cymru.

"Mae'n gyfrwng arall i Gemau Llundain 2012 adael treftadaeth addysgol, ddiwylliannol a chymdeithasol barhaus. 

"Mae cael gwarant o gyfran o'r tocynnau i'r ysgolion yn gymhelliant enfawr.         

"Yr uchelgais yw cael pob ysgol yng Nghymru i gofrestru - mae'n broses mor syml.      

"Gallwn helpu i greu cymuned chwaraeon arbennig rhwng ysgolion yng Nghymru a thu hwnt."

Cwblheir y broses mewn dwy ran. Mae'r ysgolion yn cofrestru ar y rhwydwaith i ddechrau ac yna'n cymryd y cam cofrestru nesaf i dderbyn eu gwobrau.  

I ymuno â'r rhwydwaith, dim ond ateb tri chwestiwn sydd raid i'r ymgeiswyr:     

• Pam mae eisiau ymuno?
• Beth maent wedi'i wneud eisoes i ymrwymo i werthoedd Olympaidd a Pharalympaidd?
• Beth maent yn fwriadu ei wneud yn y dyfodol?

Anogir yr ysgolion sydd wedi cofrestru, ond sydd heb gymryd y cam nesaf i ymuno, i gwblhau eu cais cyn y dyddiad cau, sef mis Rhagfyr 2011.                      

Mae athrawon neu Lysgenhadon Ieuainc Aur penodol yr Ymddiriedolaeth Chwaraeon ar gyfer Ieuenctid yn yr ysgol yn gallu cyflwyno'r cais ar ran yr ysgol.                  

Byddwch yn rhan o'r rhwydwaith nawr - ewch i www.london2012.com/getset.