Mynychodd Morse Ysgol Gyfun Stanwell ym Mhenarth a dechreuodd ar ei yrfa pan oedd yn 17 ar ôl cystadlu mewn cystadleuaeth i ysgolion yng Nghaerdydd. Yn fuan iawn ar ôl ei hennill, dechreuodd gystadlu'n genedlaethol.

Mae'n ymarfer yn NIAC yng Nghaerdydd ac mae'n derbyn hyfforddiant cryfder a siapio gyda chriw o daflwyr Olympaidd a Pharalympaidd addawol yng Nghanolfan Genedlaethol Chwaraeon Cymru.

Mae'n dal record genedlaethol Cymru ar lefel hŷn, record newydd-ddyfodiaid Cymru a record dan-23 Prydain, ac ef yw'r athletwr cyntaf o Gymru i ennill yng nghystadleuaeth y ddisgen ym Mhencampwriaethau'r DU.                 

Ef oedd prif daflwr disgen iau y DU yn 2007 a 2008 ac mae'n gefnogwr brwd i dîm pêl droed Manceinion Unedig. Dywed mai'r dylanwad mwyaf ar ei yrfa athletau yw ei deulu.

Ym mis Mai 2010, taflodd yng nghystadleuaeth bwysig Halle yn yr Almaen, ble enillodd y gystadleuaeth D23 gyda thafliad o 61.27m. Mae hyn wedi sefydlu Morse fel rhif un y Byd am daflu D23.   

Taflodd Morse dros Gymru yng Ngemau'r Gymanwlad yn Delhi yn 2010, gan orffen yn barchus iawn yn y chweched safle, ac yn 2011 cafodd ei ddewis i gystadlu dros PF ym Mhencampwriaethau D23 Ewrop.                     

Mae ganddo radd mewn Rheolaeth Chwaraeon a chymerodd Morse ran yn Aviva Star:track pan oedd yn iau a nawr mae'n hyfforddi ar gyfer y cynllun yn ogystal â hyfforddi'r tîm D11 yn ei glwb pêl droed lleol, Tref Penarth.