Mae'r chwaraewr rygbi cadair olwyn o Gastell-nedd, David Anthony, yn awyddus iawn i gystadlu am y tro cyntaf yn y Gemau Paralympaidd yn Llundain 2012.

Mae'r myfyriwr coleg o Bort Talbot eisoes wedi cynrychioli PF ym Mhencampwriaethau Ewrop yn 2009 a daeth y tîm yn agos iawn at gipio medal efydd, gan golli i'r Almaen yn y diwedd o 43-47.

Yn 2008, daeth Prydain Fawr yn agos iawn at y medalau yn y Gemau Paralympaidd, ar ôl gorffen yn bedwerydd, ac mae Anthony yn awyddus i wneud iawn am hyn pan fydd yn ymddangos yn ei Gemau Paralympaidd cyntaf yn Llundain 2012.