Ar ôl dechrau cymryd rhan mewn taekwondo yn chwech oed, ar awgrym ei thaid, mwynhaodd Jade gynnydd cyflym drwy'r rhengoedd i ddod yn rhif un yr ieuenctid yn y DU mewn unrhyw adran, ymhlith y bechgyn a'r merched.

Yn ymladd yn yr adran -55kg, cafodd y ferch sydd wedi bod yn bencampwraig iau Prydain ddwywaith yn olynol, flwyddyn dda iawn yn 2010 gan gipio medal aur cyntaf erioed Prydain yng Ngemau Olympaidd yr Ieuenctid yn Singapore. Yn ystod yr un flwyddyn, enillodd yr aur ym Mhencampwriaethau Agored Paris a'r Iseldiroedd cyn ymladd ei ffordd at arian ym Mhencampwriaethau Iau'r Byd ym Mecsico. Bu'r pontio i'r rhengoedd hŷn yn ddidrafferth iawn i Jade a chipiodd fedal efydd yn y Pencampwriaethau Ewropeaidd.               

Mae Jade bellach yn aelod o sgwad elitaidd hŷn Taekwondo Prydain ac yn ymladd yn yr adran pwysau -57kg Olympaidd, a pharhaodd ei llwyddiant yn cipio medalau ar raddfa fawr yn 2011. Ei huchafbwynt oedd ennill medal arian ym Mhencampwriaethau'r Byd yn Ne Korea - gan fethu ennill yr aur o drwch y blewyn, a cholli mewn gêm benderfynu dyngedfennol yn erbyn ei gwrthwynebydd Tsieineaidd. Hefyd, cipiodd yr aur (-62kg) a'r efydd (-57kg) ym Mhencampwriaeth Agored UDA, yr arian ym Mhencampwriaeth Agored yr Almaen, efydd ym Mhencampwriaeth Agored Chuncheon, aur ym Mhencampwriaeth Agored Prydain ac efydd ym Mhencampwriaeth Agored Ffrainc.

Mae dechrau da arall yn 2012 wedi gweld Jade yn ennill yr arian ym Mhencampwriaeth Agored yr Almaen ac efydd ym Mhencampwriaethau Ewrop.

Mae wedi ennill gwobrau dirifedi, gan gynnwys Personoliaeth Chwaraeon Ifanc y Flwyddyn BBC Wales a Chydnabyddiaeth Arbennig Academi Chwaraeon Jaguar a Gwobrau Seren y Dyfodol.                                              

Mae'n hyfforddi yn Academi Taekwondo PF ym Manceinion, ar y Rhaglen Berfformio Safon Byd, o dan lygad barcud Cyfarwyddwr Perfformio Tîm PF, Gary Hall.