Mae Cooke yn un o dalentau chwaraeon gorau Cymru. Mae ganddi lu o gyflawniadau i'w henw - gan gynnwys yr aur yn y Gemau Olympaidd yn Beijing.

Yn 16 oed enillodd ei theitl cenedlaethol hŷn cyntaf, gan ddod y feicwraig ieuengaf i gipio teitl y merched hŷn ym Mhencampwriaethau Rasio Ffordd Cenedlaethol Prydain.

Wrth ofyn iddi sut dechreuodd y cyfan, mae'n dweud, "Wrth dyfu i fyny, roedden ni'n gwneud llawer o feicio fel teulu, roedd hyd yn oed ein gwyliau ni ar dandems!"

Trodd yn broffesiynol yn 2002, gan rasio i dîm Sbaenaidd-Eidalaidd Deia-Pragma-Colnago, gan symud i Treviso ble dysgodd siarad Eidaleg. 

Mae wedi cael gyrfa anhygoel gan gasglu teitlau a medalau Cwpan y Byd, Pencampwr Byd a Gemau'r Gymanwlad.

Ond dydi pethau heb redeg yn esmwyth bob amser. Cafodd lawdriniaeth yn 2004 i wella problem gyda'i phen-glin. Torrodd bont ei hysgwydd yn 2005.

Roedd 2008 yn flwyddyn lwyddiannus. Ymunodd â Thîm Halfords BikeHut ac aeth ymlaen i ennill ei nawfed teitl fel pencampwr ras ffordd. Cafodd fuddugoliaeth ddramatig yn y ras ffordd yng Ngemau Olympaidd 2008 yn Beijing. Hi oedd y ferch gyntaf i fod yn Bencampwr ras ffordd y Byd ac i ennill medal aur Olympaidd yn yr un flwyddyn.

Teithiodd i Delhi yn 2010 i gynrychioli Cymru yng Ngemau'r Gymanwlad. Daeth yn bumed.