Ar ôl dioddef o anaf difrifol yn chwarae rygbi, datblygodd Dave Rowe ddiddordeb mewn meddygaeth chwaraeon ac adfer, yn y gobaith y byddai modd llenwi'r bwlch a oedd wedi'i adael gan y diwedd cyn ei amser i'w yrfa chwaraeon drwy weithio i helpu athletwyr eraill.                                               

Mae Dave, sy'n Gydlynydd Tylino Chwaraeon preswyl yn Athrofa Chwaraeon Cymru, wedi cymhwyso gyda diploma RSA mewn Therapi Tylino Chwaraeon ers 1994.

Wrth siarad am ei swydd, dywedodd Dave:

"Rydw i wedi bod yn ffodus i gael gweithio gyda rhai o oreuon y byd chwaraeon yng Nghymru ers i mi ddechrau arni yn 1994. O athletau, ble rydw i wedi gweithio ym Mhencampwriaethau Athletau'r Byd, a marathon a hanner marathon Caerdydd, i sgwad rygbi hŷn Cymru."

Wedi gweithio hefyd gyda thimau pêl droed yr Uwch Gynghrair a'r Bencampwriaeth, Fulham, Dinas Caerdydd a West Ham, mae Dave wedi bod yn Dylinwr Chwaraeon i sgwad pêl droed hŷn Cymru, gan weithio mewn mwy na 100 o gemau a theithio'n helaeth ledled Ewrop a thu hwnt.                        

Yn gryno, pwrpas rôl Dave yw gwella potensial perfformio drwy ddefnyddio tylino nid yn unig fel rhan o raglen adfer ond hefyd fel rhan o baratoadau athletwyr, y cadw cyflwr a hefyd i atal anafiadau.

Mae'n gweithio'n rheolaidd gyda sêr chwaraeon presennol ac addawol Cymru, gan gynnwys Helen Jenkins, Brett Morse, David Davies a Georgia Davies i enwi dim ond rhai, a gyda'r rhan fwyaf o chwaraeon, gan gynnwys athletau, nofio, jiwdo, gymnasteg, bocsio, chwaraeon anabledd, saethu a beicio.