Mae'r meddyg ymgynghorol gyda Chwaraeon Cymru, Dr Mark Ridgewell, wedi bod yn ymarfer ers 1986 ac mae ganddo gefndir mewn meddygaeth chwaraeon sy'n cynnwys cyfuniad unigryw o chwaraeon.

O athletau, nofio, beicio, chwaraeon anabledd, gymnasteg a saethu, mae Dr Ridgewell yn darparu cefnogaeth feddygol i rai o'r athletwyr mwyaf uchel eu proffil yng Nghymru, gan gynnwys Jazz Carlin, Becky James, Nathan Stephens a David Davies.

Dywed Dr Ridgewell;

"Rydw i'n asesu ac yn cynghori athletwyr ynghylch ystod eang o anafiadau a salwch a allai gael effaith ar eu gallu i hyfforddi a pherfformio. Rydw i'n cynghori ynghylch triniaeth a rhaglen adfer, yn rhoi cyngor gwrth-gyffuriau a chefnogaeth gyffredinol."

Ar ôl datblygu diddordeb mewn Meddygaeth Chwaraeon ac ar unwaith bron ar ôl cymhwyso fel meddyg yn 1986, aeth Mark yn ei flaen yn fuan iawn i gwblhau gradd Meistr mewn Chwaraeon a Meddygaeth Ymarfer ym Mhrifysgol Caerfaddon a hefyd llwyddodd i ennill Diploma Colegau Brenhinol yr Alban yn 1999. Mae wedi bod yn gweithio gyda pherfformiadau elitaidd a pherfformiad uchel byth ers hynny.  

Mae ei CV yn cynnwys swyddi gyda Chlwb Rygbi Abertawe a thimau rygbi Cymru D18 a D21, Prif Swyddog Meddygol gyda Bwrdd Criced Lloegr, y Gweilch a Chymdeithas Bêl Droed Cymru ac mae Dr Ridgewell hefyd wedi teithio i'r Gemau Cymanwlad ddwywaith fel Meddyg Tîm gyda Thîm Cymru.          

Un o'r athletwyr y mae Dr Ridgewell yn gweithio â hi yn rheolaidd yw'r ferch sydd wedi ennill medal efydd yn y Gymanwlad, Georgia Davies. Dywedodd;

"Mae pawb sy'n cystadlu ar lefel uchel eisiau gwneud yn siŵr eu bod yn gwneud popeth o fewn eu gallu i wella. Wrth nofio, mae'r 100fed a'r 10fed o eiliad yn gallu bod yn hollbwysig felly os ydi rhywun yn gallu gwneud unrhyw beth i wella fy mherfformiad i yna rydw i'n fwy na pharod i dderbyn hynny.        

"Rydyn ni wir yn ffodus o gael Mark yn feddyg i ni. Rydyn ni'n gweithio ar fesurau atal gan fod nofio yn gamp heb gyswllt, felly mae'n ymwneud mwy â bod yn sâl na chael anaf, yn enwedig gan ein bod ni'n hyfforddi ar lefel mor uchel ac am gymaint o amser bob dydd. Rydyn ni'n cymryd fitaminau ac ategolion ac mae'n grêt am argymell popeth. A hefyd rydyn ni'n cael profion gwaed i wneud yn siŵr bod lefel ein haearn ni'n iawn, felly mae'n grêt cael rhywun sy'n deall chwaraeon a meddygaeth wrth gwrs, ac yn gallu cyfuno'r ddau."

Mae pump aelod o staff o Athrofa Chwaraeon Cymru'n cael eu dilyn gan BBC Radio Wales i weld y gwaith sy'n digwydd y tu ôl i'r llenni yn ystod y cyfnod yn arwain at Gemau Llundain 2012.

Mae rhagor o wybodaeth am Mark Ridgewell a'r gwaith mae'n ei wneud gyda Georgia Davies ac athletwyr eraill i'w gweld yma; mae eu cyfweliad 2 awr 50 munud i mewn i'r rhaglen.