Yn ystod trydedd blwyddyn Laura yn astudio chwaraeon a gwyddoniaeth ymarfer ym Mhrifysgol Fetropolitan Caerdydd, gwnaeth gais am interniaeth ffisioleg yn Chwaraeon Cymru. Yn ystod ei diwrnod cyntaf yn y swydd, cafodd fedydd tân mewn gwersyll ymarfer rhwyfo Dan 23 gan Brydain Fawr:                                               

"Rydw i wrth fy modd gyda'r bwrlwm o weithio mewn amgylchedd perfformiad uchel yn helpu'r athletwyr i fod y gorau y gallan' nhw. Fe weithiais i gyda nifer o chwaraeon yn ystod fy interniaeth i, gan gynnwys Rhwyfo Cymru, Beicio Cymru a Saethu Cymru."      

Unwaith cafodd Laura radd dosbarth cyntaf gydag anrhydedd, fe'i penodwyd yn ffisiolegydd llawn amser yn Chwaraeon Cymru. Ei gwaith yw sicrhau'r perfformiadau gorau posibl drwy ddefnyddio nifer o fethodolegau i sicrhau bod yr hyfforddiant a gyflwynir yn briodol.                  

Mae hi'n monitro'r hyfforddiant i sicrhau bod y system egni briodol yn cael ei thargedu i wneud yn siŵr bod y corff yn addasu i'r hyfforddiant. Er mwyn sicrhau bod y corff yn addasu ac yn gwella, mae hi'n perfformio asesiadau ffisiolegol rheolaidd er mwyn monitro cynnydd.            

"Hefyd," eglura Laura, "gall ffisioleg ddarparu gwahanol fathau o ysgogiadau i sicrhau gwelliannau mewn perfformiadau, er enghraifft, hyfforddiant altitiwd. Mae ffisioleg hefyd yn helpu ein hathletwyr i baratoi ar gyfer cystadlu, er enghraifft, strategaethau cynhesu ac adfer priodol a chynefino â hinsawdd mewn tywydd eithafol."

Ar hyn o bryd, mae gwaith Laura yn canolbwyntio'n bennaf ar Focsio Cymru, Beicio Sbrint Cymru, Bowlio Cymru a Rhwyfo Cymru. Mae hi wedi gweithio gyda thîm rhwyfo Dan 23 PF mewn dau wersyll yn Chwaraeon Cymru ac mae'n helpu yn Athrofa Chwaraeon Lloegr yn Bisham Abbey yn ystod y paratoadau Olympaidd a Pharalympaidd prysur.                       

Mae hi hefyd yn astudio am radd Meistr mewn chwaraeon a gwyddoniaeth ymarfer ym Mhrifysgol Fetropolitan Caerdydd.