Mae Owen wedi gweithio fel Ymgynghorydd Perfformiad Uchel ers 2011 - cyn hynny, roedd yn swyddog datblygu gyda Chwaraeon Cymru a dywed bod chwaraeon wedi bod yn rhan allweddol o'i fywyd erioed:

"Rydw i wedi bod yn gysylltiedig â chwaraeon erioed. Drwy chwarae, hyfforddi ac astudio, mae wastad wedi bod yn brif elfen o fy mywyd i yn tyfu i fyny, fy addysg, fy nghyfnod yn y coleg a 'mywyd proffesiynol i."

Yn chwaraewr rygbi brwd, mae wedi chwarae yng nghynghreiriau cenedlaethol Cymru a Lloegr ac mae wedi treulio amser yn chwarae yn Ne Affica a'r Unol Daleithiau.

Astudiodd wyddoniaeth chwaraeon a ffisioleg ym Mhrifysgol Caerfaddon - gan weithio yn ystod blynyddoedd cynnar rhaglen Tîm Caerfaddon. Cyn ymuno â Chwaraeon Cymru, gwnaeth Owen waith ffisioleg hefyd ym Mhrifysgol Talaith Penn.

Dywed Owen mai'r "cynllunio" sy'n allweddol yn ei rôl:

"Gan weithio'n agos gyda'r cyfarwyddwyr a'r hyfforddwyr perfformiad yn y cyrff rheoli, rydyn ni'n trosi ein dealltwriaeth gadarn o anghenion yr athletwyr elitaidd mewn disgyblaeth neu gamp arbennig yn gynllun sy'n gwneud yn siŵr bod popeth y mae arnynt ei angen ar gael iddyn nhw'n hwylus ar yr amser priodol.                     

"Yn nes i lawr y system, mae'n ymwneud â sicrhau bod gweithdrefnau a strwythurau yn eu lle sy'n rhoi'r cyfle gorau posibl i athletwyr ifanc talentog gyflawni eu potensial a chyrraedd safon byd. Ond hefyd mae'n ymwneud â helpu ac annog pobl i wneud penderfyniadau anodd. Mae chwaraeon elitaidd yn ymwneud â bod a photensial i fod yn ddigon da neu ddim, a pha un ai ydych chi'n debygol o gyflawni'r potensial hwnnw."

Mae prif ffocws Owen ar athletau, nofio, saethu, jiwdo a chodi pwysau.