Arolwg ar Chwaraeon Ysgol
Arolwg ar Chwaraeon Ysgol
Arolwg 2013 ar Chwaraeon Ysgol
Mae'r ail Arolwg Cenedlaethol erioed ar Chwaraeon Ysgol ar agor
yn awr.
Yn 2011, cwblhaodd 40,000 yr holiadur ar-lein - yr arolwg mwyaf
ar blant, pobl ifanc a chwaraeon yng Nghymru hyd
yma.
Ymhlith y prif ddarganfyddiadau roedd lefelau'r cyfranogiad mewn
clwb ymhlith disgyblion ysgolion cynradd ar y lefel uchaf i'w
chofnodi (85%) ers 2000, tra bo'r bwlch rhwng y rhywiau i fechgyn a
merched sy'n cymryd rhan mewn chwaraeon i'w weld yn cynyddu drwy
gydol yr ysgol uwchradd.
Mae gan yr ysgolion a'r awdurdodau lleol sy'n sicrhau digon o
ymatebwyr hawl i gael adroddiad personol am ddim ar ganlyniadau eu
disgyblion, gyda'r nod cyffredinol o wneud penderfyniadau a
gwelliannau'n seiliedig ar dystiolaeth.
Mae'n bwysig iawn cofio bod Estyn yn cydnabod yr arolwg fel
adnodd effeithiol ar gyfer sichrau tystiolaeth o les yn eu
cyfarwyddyd hunanarfarnu i ysgolion.
Pennaeth AG Llanilltud Fawr yn siarad am sut
a pham mai'r ysgol yw'r gyntaf yng Nghymru i gymhwyso am
adroddiad llawn: http://www.youtube.com/watch?v=lH4yaVITIi8
Isod fe welwch chi ffilm fer gan enillydd medal aur
Paralympaidd, yn dweud pam ei bod mor bwysig i ddisgyblion
gwblhau'r arolwg. Gellir gweld y ffilm ar You Tube hefyd:
http://www.youtube.com/watch?v=uafV4O0cxJ8&feature=youtu.be
Bydd yr arolwg llawn yn weithredol o Ebrill 8fed
ymlaen tan ddiwedd tymor yr haf. Bydd yr ysgolion yn derbyn
cyfarwyddiadau personol ar gyfer mynd i mewn i'w harolwg eu
hunain.
I gael rhagor o wybodaeth am yr Arolwg ar Chwaraeon Ysgol a'r
manteision i ysgolion a sefydliadau chwaraeon, edrychwch ar y ffilm
isod.
Arolwg 2011
Cynhaliwyd yr arolwg cyntaf ar Chwaraeon Ysgol yn ystod tymor yr
haf 2011. Gan adeiladu ar ugain mlynedd o arolygon gan Chwaraeon
Cymru ar gyfranogiad pobl ifanc mewn chwaraeon, a'r ddarpariaeth
chwaraeon mewn ysgolion, mae data'r arolwg hwn yn galluogi i ni a'n
partneriaid fonitro a chofnodi'n strategol y tueddiadau mewn Addysg
Gorfforol (AG) a chwaraeon ysgol, a darparu sylfaen ar gyfer
dylanwadu ar bolisïau ac arferion
chwaraeon.
Yn yr arolwg yn 2011, cwblhaodd bron i 40,000 o ddisgyblion ym
Mlynyddoedd 3-11 yr holiadur, gan wneud hwn yr arolwg cenedlaethol
mwyaf erioed ar blant a phobl ifanc yng
Nghymru.
Mae'r prif ystadegau a'r adroddiad ar
gyfranogiad pobl ifanc mewn chwaraeon ar gael yn
awr.
Tystiolaeth o les
Mae lles wedi dod yn faes polisi cynyddol bwysig i'r sectorau
addysg, iechyd a chwaraeon. Fel y gwyddoch yn sicr, mae fframwaith
arolygu ysgolion Estyn yn rhoi lle canolog i les ym mhrofiad
dysgu'r disgyblion.
Er mwyn gwneud yn siŵr bod ein polisïau chwaraeon yn lleol ac yn
genedlaethol yn llwyddiannus ar gyfer ein plant a'n pobl ifanc, mae
gwrando ar eu barn a'u safbwyntiau'n hollbwysig. Mae'r Arolwg ar
Chwaraeon Ysgol yn ffordd effeithiol o roi llais i ddisgyblion, a
galluogi i ni ganfod y bylchau mewn cyfranogiad chwaraeon yng
Nghymru.
Mae hefyd yn hanfodol bod chwaraeon yn deall yn well ac yn
hyrwyddo'r cyswllt rhwng chwaraeon a lles ac, yn bwysig iawn i ni
yn Chwaraeon Cymru, yn cynghori Llywodraeth Cynulliad Cymru yn y
maes hwn fel rhan o'i pholisiCreu Cymru Egnïol. Mae'r
Llywodraeth yn cefnogi'r arolwg yn llawn.
Mae addysg gorfforol a chwaraeon ysgol yn chwarae rhan hanfodol
mewn cyfrannu at les corfforol, cymdeithasol ac emosiynol y
disgyblion i gyd. Mae'r Arolwg ar Chwaraeon Ysgol yn cynnig cyfle i
helpu ysgolion i ddangos tystiolaeth o sut mae chwaraeon ac addysg
gorfforol yn cyfrannu at yr agenda
les.
Cafodd pob ysgol a gwblhaodd yr Arolwg ar Chwaraeon Ysgol gyda
sampl digonol o ddisgyblion adroddiad dwyieithog ar eu
data. Yn 2011, dosbarthwyd 198 o adroddiadau i ysgolion ledled
Cymru. Mae'r adroddiadau wedi'u strwythuro ar sail y pedwar
canlyniad lles, fel yr amlinellir gan Estyn: agweddau at gadw'n
iach a diogel; cyfranogiad a mwynhad wrth ddysgu; cyfranogiad
cymunedol a gwneud penderfyniadau; a sgiliau cymdeithasol a
bywyd.